接二連三都有唔同行業嘅朋友轉工，就算係有些進入了巨無霸企業的，其實都已經十分高層，仍然轉來轉去。有朋友已經去到director grade，都係響公司做咗三年貨仔左右，便轉工去也。澳洲現在勞工市場十分熾熱，人才短缺，尤其是在我哋叫做post COVID 時期，就算獵頭公司都甚難於短時間內搵到合適嘅人選。
週日嘅時候同一位負責HR System Development嘅朋友傾開，佢亦都係其中一位跳槽人士，我哋喺討論裏邊提到究竟現時所謂嘅「忠誠度」是否仍然存在，到最後大家都同意，現時職場整個人事風氣已經進入一個嶄新嘅維度。
朋友認為，現時職場已經進入一個叫做personal portfolio嘅年代，即係話每一個人現在並非着眼於一份工打一世，而係點樣去豐富個人嘅履歷。佢話要從兩個層面去思考：第一個層面係個人層面，就正如剛才所講，個人需要豐富自己嘅履歷，更集中更專門去令到自己喺某一個項目上成為expertise，尋求在自己嘅工作崗位上能夠達到project base嘅Achievement，從而將呢啲「成功個案」寫喺履歷裏面。這樣嘅履歷無疑十分吸引雇主的眼球，學歷，在現代職場相對變得次要，因為雇主來說，相關學歷已經係基本，無需過分着重。
湊巧幾日前同另外一位IT嘅朋友都係討論過呢個問題，佢提出嘅觀點與週日傾談嘅朋友基礎上係一樣嘅。兩位朋友喺職場上都有接近30年工作經驗，而佢哋嘅睇法相當一致。
從企業層面去睇，大企業似乎亦都鼓勵員工多到外闖闖，學習新技術以及新思維，然後將呢啲新思維帶回企業。因此佢哋唔多介意員工跳來跳去，總之唔好幾個月就轉一次工就得啦。大企業甚至鼓勵員工返兜，雖然我之前嘅分享裏邊亦都提過返兜都有一定嘅風險，喺上述呢個情況吓，似乎正面嘅誘因比較大。而且一般來講，跳槽所得到嘅人工一定比起之前嘅崗位要高，更為吸引。
根據過去幾年嘅觀察，一般來講一個人現時會逗留係一間企業嘅時間大約為兩至三年，而就現時嘅人力資源分配情況預期，市場將會有更多係project base嘅consultant出現，集中處理有啲比較一次性亦難攪嘅課題，用完拜拜。另一個近年非常流行嘅就係，為咗節省成本效益，有企業會以合約形式每兩年跟員工簽署，萬一勞工市場或國際社會出現任何劇烈變化，企業都能夠及時控制人手，不會因此而蒙受巨大損失。
若單純以人事管理角度出發，我會歸納現時企業會需要四種程度嘅員工：
1. Clerk base – 公司的基本盤，他們主要係處理日常文件，簿記，營運等基礎工作。他們一般只需要於行業領域上有基礎認識，屬於默默耕耘那種。工作例如前線員工、後勤嘅所謂「working bee」，便是這種。
2. 管理階層 – 制定政策，公司方向，財務預算等。從一個宏觀嘅角度去制定公司發展。他們一般比較穩定，因為處於那個位置，工資相對理想，而且亦已經有一定嘅工作經驗及人脈。
3. 技術員工（skill base）- 在某些行業，例如醫護、教育、維修行業等等，他們需要一批擁有該項技術才能作業的員工，而這些技術，並非一時三刻便能夠學識，需要得到某些資格。這些技術人員若要轉型（除非成為管理層）的話，很多時候便要將自己嘅資歷推倒重來。
4. Project consultant – 這個就是剛才所講將會新興起嘅其中一個範疇，以自雇名義，逐個項目收費。他們大部份只會在自己專長的領域上處理所委托嘅工作，做多啲都唔會制，又或者，其實佢都唔識。
以上四個分類當然非常概括，在大家建立自己嘅個人發展時，是一個參考。每個類別當然可以有互動，亦都可以跳來跳去，最重要係自己希望向那個方向發展建立事業。例如若果用返人事部嘅睇法，有興趣change management 、organisation structure及people management這幾個範疇，開始嘅時候就可能係公司嘅基本盤，負責協助編制文件、做presentation、又或者係聯絡、約見等工作。當慢慢拾級而上，可能自立門戶，參與項目並協助公司改組，又或者喺公司已經躍升成為管理層，制定人事政策。
若然市場真係迎着我所講嘅呢個方向走，職場上所謂嘅「忠心」就唔會再係雇主好睇重嘅一個範疇，反而求職者應更着重如何能夠於面試時向面試官展現自己最專長的事情以及在這些事情上的成就。
在這個全新的職場年代，祝各位都能夠旗開得勝。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
https://www.buymeacoffee.com/SydneyHRDnN
你的支持是我的動力！不需介意，如果願意的話可以給我一點的鼓勵，我會繼續與大家分享生活點滴以及不同的時事。