若然係被獵頭公司篩選左嘅話，你面試時候面試官所問嘅問題就唔會好似之前文章所提到的面試方式，原因係既然已經經過篩選，呢班人嘅工作能力以及對職能嘅認識應該係有一定嘅水平，因此面試會集中討論你嘅處事方式以及與公司配合與否，簡單來講就係睇你嘅「軟實力」（Soft skills），而問嘅問題有可能更加尖銳…
有啲人搵工，可能會用獵頭公司（Headhunter）。其實獵頭公司又係點樣運作㗎呢？透過獵頭公司搵工，成效有幾大呢？
首先讓我地了解吓獵頭公司嘅運作方法，一般來講獵頭公司可能受到企業嘅委托，需要幫手尋找一啲指定嘅職位。獵頭公司會收取一個百分比作為傭金，通常都會有最低消費，喺澳洲，大約係人工嘅16%。若然需要去搵一啲比較高級嘅職位，就有可能上到30%仲會加上要先支付一啲嘅雜費。獵頭公司係冇「包生仔」呢回事嘅，同時間佢哋都會先同公司去拎一個exclusive period，即係係一段時間裏便公司只可以用一間獵頭公司去搵同一個嘅職位，用以保障獵頭公司嘅利益。
好多獵頭公司都會有「三個月包換服務」，即係若然所招聘嘅員工表現唔理想嘅話，三個月之內獵頭公司會免費幫你換過一個。咁當然唔會免費幫你無限loop，因為這只會顯出獵頭公司辦事不力。一般來講兩三次已經好盡，如果成日都發生，獵頭公司真係費鬼事同你做生意。
如果你被獵頭公司邀請面試，又有乜嘢需要注意嘅呢？首先你嘅衣着並唔會因為你去見邊個而改變，見獵頭公司當然需要有專業嘅裝束，可以參考返之前嘅文章；談吐以及舉止，亦都不會有太大嘅差別。最大嘅唔同就係見完獵頭公司唔代表你已經成功，只係代表你係被篩選左出嚟進行下一場嘅面試。小弟曾經見過獵頭公司，最後進行左五次嘅面試，其中獵頭公司佔兩次（一次面試，一次軟件測驗），另外三次則是應徵公司嘅三階段面試；雖然最後不成功，也是一次很難忘的經驗，因為未試過要見咁多次。
若然係被獵頭公司篩選左嘅話，你面試時候面試官所問嘅問題就唔會好似之前文章所提到的面試方式，原因係既然已經經過篩選，呢班人嘅工作能力以及對職能嘅認識應該係有一定嘅水平，因此面試會集中討論你嘅處事方式以及與公司配合與否，簡單來講就係睇你嘅「軟實力」（Soft skills），而問嘅問題有可能更加尖銳，因為你畢竟係被篩選出嚟嘅，對你嘅要求相對更高。
咁即係話，若然獵頭公司將你放咗落去第二輪嘅面試，你就需要更加努力咁樣做功課，隨時準備被問到有關應徵公司嘅一啲資料。當然獵頭公司都會將公司嘅背景同歷史同你作出分享，你自己亦都需要在網上多搵一啲資料，作好準備。
一連五日嘅澳洲返工DoRaMe終於告一段落，希望大家都能夠喺當中有所得着。雖然喺澳洲作人事部管理並不太長，總有一個感覺就係一步一驚心，因為澳洲始終多元文化，咩人都有，見工嘅時候好多嘢都真係估佢唔到。莫講話應徵嗰個，就算做見嗰個，好多時候都一額汗。
祝各位好運。
關於作者：澳洲企業HR人，作者授權。
免責聲明：博客作者之立場並不代表Ozstarter的立場， 敬請留意