《人事世界》－演算法搵工新時代
近年愈來愈多企業開始使用人工智能（AI）篩選履歷。根據 MyPerfectResume 最新報告，73%僱主已經使用AI參與招聘流程，甚至有一半公司承認，系統會喺真人未睇CV之前，自動淘汰最多50%申請者。換句話講，而家好多求職者，根本連「見人」嘅機會都冇，就已經被演算法篩走。 不過，有一點亦要講清楚：現時AI招聘其實主要集中喺大型企業同跨國公司，而唔係一般中小企。因為AI recruitment systems最大用途，本身就係處理海量申請。當一個 graduate program 或者 entry-level 職位一口氣收到幾百甚至上千份CV，真人根本冇可能逐份睇。 數據亦支持呢個趨勢。根據多份招聘市場研究，接近99% Fortune 500企業已經使用ATS（Applicant Tracking System）系統，而大型企業整體ATS使用率超過七成。部分大型企業更加已進入「AI-first recruitment」模式，即係履歷會先經AI parsing、AI scoring、AI ranking，最後真人HR只睇系統篩剩嘅少數人。 相反，中小企目前仍然較多依賴真人招聘。尤其澳洲本地中小企，其實好多仍然偏向老闆親自睇CV、靠熟人介紹、recruitment agency，或者直接電話傾感覺。因為對一間只有十幾廿人嘅公司而言，一個職位可能只收到幾十份CV，根本未去到需要全面AI化。 但問題係，呢個趨勢正慢慢改變。 隨住愈來愈多求職者開始利用AI大量send CV，企業收到嘅申請數量亦愈來愈誇張。結果連部分中小企都開始頂唔順，慢慢導入AI filtering tools。以前只有enterprise用得起嘅ATS，而家已經變成月費制甚至單次收費服務。市面上最平幾百蚊澳紙已經有交易，包含AI履歷篩選、模擬真人網上面試，再加埋分析report。相比起動輒幾千甚至幾萬蚊請Recruitment Agency，對好多公司而言當然化算得多。即係話，AI招聘正由大型企業慢慢滲透至整個市場。 而最吊詭嘅地方係，好多人其實仲未知遊戲規則已經變咗。 以前寫CV，大家會教你整靚啲、設計感強啲、突出個人風格。但今日好多大型企業使用嘅ATS或者AI recruitment tools，其實根本唔識欣賞你份CV靚唔靚。對系統而言，最重要唔係美感，而係「讀唔讀到」。即係話，愈花巧嘅CV，反而愈容易死。 好多人鍾意用Canva整履歷，加入圖表、timeline、icon、技能Bar，甚至雙欄排版，睇落好似好專業。但對AI system嚟講，呢啲設計反而會搞亂格式辨識。有啲系統甚至連你邊段係工作經驗、邊段係學歷都分唔清。結果你明明有十年經驗，AI可能只讀到兩年。 更現實嘅問題係，AI其實未必真係咁「智能」。好多ATS至今仍然高度依賴關鍵字（keywords）matching。即係話，你有冇能力唔一定最重要，最重要反而係你有冇寫中佢想見到嘅字。例如招聘廣告寫「stakeholder management」，你份CV如果寫「liaising with clients and internal parties」，雖然真人睇落可能係差唔多意思，但部分系統未必識得咁樣理解。於是你有相關經驗，都可能直接被淘汰。 呢個亦解釋點解而家愈來愈多人開始「為AI寫CV」。 現時最有效做法，已經唔係寫一份萬能CV周圍send，而係每見一份工，就根據Job Description重新調整履歷內容。對方廣告寫咩字，你最好就用返咩字。因為AI第一步做嘅，其實係將職位要求拆解成技能、經驗、證書、行業背景等元素，再逐樣matching。 所以而家求職，某程度上已經變成一場「keywords game」。求職者開始用AI寫CV，而企業就用AI篩CV。結果變成：AI幫人寫履歷，AI幫公司篩履歷，AI ranking，真人最後只睇AI揀剩嗰批人。某程度上，招聘市場已經進入「演算法對演算法」時代。 理論上，AI唔會睇你種族、性別、年齡，好似比真人更客觀。但現實並冇咁理想。近年已有研究指出，AI screening systems仍然存在偏見問題。因為AI本身係用歷史招聘數據訓練，而如果過去公司本身已經存在偏好，例如偏向某類背景、某間大學、某種工作經歷，AI就有可能照單全收。結果，只係由「人類偏見」，變成「自動化偏見」。 企業自己其實都知道有問題。根據MyPerfectResume調查，47%僱主承認，AI有可能篩走咗一啲原本真人會考慮嘅求職者。即係話，連公司自己都知道套系統會錯殺人，但因為AI夠快、夠平、夠方便，所以照用。現實，就是如此。 當一個職位有幾百人申請，HR根本冇可能逐份CV慢慢睇。AI對企業而言，最大價值從來唔係「準確」，而係「節省時間」。就算錯殺一部分人，公司都覺得值得。因為對企業而言，招聘唔係搵「所有適合嘅人」，而係盡快搵到「夠用嘅人」。 而家求職市場，其實已經分成兩關。第一關唔係見HR，而係「過AI」。如果你連AI嗰關都過唔到，你根本冇機會展示真正能力。 因此，起碼而家係，現代求職者嘅CV已經唔再係純粹寫畀人睇，而係一份「機器可讀文件」。格式愈簡單愈好，內容愈直接愈好，關鍵字愈清晰愈好。與其花時間整靚份CV，不如花時間研究下Job Description究竟想要咩字眼。 以前大家成日話教育制度將人訓練成「考試機器」，點知而家連求職，都開始變成「迎合演算法」遊戲。 當招聘流程愈來愈AI化，真正有能力嘅人，未必一定最容易被睇見；最容易被睇見嘅，往往係最識得配合系統嗰批人。 而呢種趨勢，恐怕只會愈來愈嚴重。 關於作者：作者為一企業人事部職員，同時為合資格Life Coach、國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
