你信唔信都好，頭10分鐘已經高下立分，面試官嘅態度係響頭10分鐘一般都會好客氣，為嘅就係感受你嘅能量指數。如果你發現佢嘅態度改變，同你繼續傾落去，可能都只係一個禮貌而已。
見完工，你當然忐忑不安知道自己究竟得唔得。即係嗰種考完試未派成績嗰種感覺，然後會估吓究竟係咪自己有咩做得唔好，又或者係咪已經冇機會。今天會同大家分享一下見工之後整個篩選嘅過程，等你以後搵工之後唔使有得震冇得瞓，完全公開透明，絕對唔係閂埋門搞小圈子。
有啲企業係有一個既定流程，好多時候由投遞履歷到真係見你可能需要一段嘅時間。小弟曾經試過等咗半年先至收到電話叫我去見工，見工之後亦都等咗兩個幾禮拜先至有回覆。
見工之後，一般來講大約一至兩星期一定會收到答覆，若然一個星期後未收到回應嘅話可以發一個電郵又或者打個電話去公司問人事部，起碼大概知道要等幾耐。若然唔成功嘅話，人事部通常都會立即講俾你知。如果人事部冇搵你嘅話，有機會係以下情況：
1. 仲見緊人－你又唔係唔得，又可能唔係最得嗰個，人事部可能想多見幾個對比下。
2. 忙到唔記得－有突發情況，又或者有其他事情忙緊，於是就忽然失憶唔記得咗你嘅存在。唔緊要，即管搵吓佢，話俾佢知其實你都緊張呢個位置。
3. 其實係唔得－唔通知你，可能係默認咗你面試並不成功。
4. 每次HR都會話而家係一個面試過程，而佢哋都仲見緊唔同嘅應徵者唔好信到十足，因為有時候好可能得個一個半個，呢啲係例行台詞，自行判斷。
咁喺面試嘅時候又有冇一啲蛛絲馬跡可以睇到其實自己有冇機會呢？以下有一啲可能係面試嘅時候你會忽略嘅肢體動作：
1. 如果見你嘅係人事部加埋部門主管，成個面試過程部門主管保持沉默，唧都唔笑，甚至成程面黑，咁你知道你有幾多機會啦。
2. 如果唔係面黑，而係喺度舂緊眼瞓，效果同上。
3. 成日睇手錶可能係代表佢有啲唔耐煩，希望面試盡快完結。
4. 而家因為疫情興視像面試，若然你見到佢經常冇望住鏡頭，你就知道佢喺度做緊自己野
5. 一般正常面試時間大約30分鐘左右，如果坐低冇10分鐘你就走得嘅話，心裏有數。
6. 倒返轉，同你雞啄唔斷，講足一個鐘嘅話，咁你機會又會多啲喎。
7. 你信唔信都好，頭10分鐘已經高下立分，面試官嘅態度係響頭10分鐘一般都會好客氣，為嘅就係感受你嘅能量指數。如果你發現佢嘅態度改變，同你繼續傾落去，可能都只係一個禮貌而已。
面完試嘅你，快啲諗返，有冇發現呢啲情況呢？而最後所發生嘅事情係咪就如上述所講嘅呢？如有雷同，不屬巧合。
關於作者：澳洲企業HR人，作者授權。
免責聲明：博客作者之立場並不代表Ozstarter的立場， 敬請留意