小心回答強與弱－當被問及strength and weakness嘅時候，十個著有八個都會答錯。好多人會將呢樣嘢同advantage and disadvantage混淆。前者係有關待人接物以及處事手法嘅意思，後者通常係有關知識層面經驗又或者技術。例如好多人會回答英語係佢哋嘅weakness….
我諗除咗追女仔第一次掂佢隻手仔係緊張到手騰腳震之外（反過來亦然），見工都可以好緊張，因為成敗就係影響你能唔能夠得到嗰個嘅職位。
由於工作關係，每年都會面試唔少嘅人。見工嘅咩人都有，光怪陸離，有啲更加啼笑皆非。下面會同大家討論一啲見工時候應有嘅態度同埋一啲唔可取嘅態度。
反面教材篇：
1. 着錯衫化錯妝－一般白領，除非見工嗰陣講到明可以Business Casual，一般來講男嘅點都會打返條呔，女嘅都會着返件套裝，這是基本禮貌。你話咩時代呀仲打呔？冇錯，見你嗰個可能冇打，你有打係代表你有尊重個場合，着套裝道理相同。我曾經請過工程師，佢着住T恤牛仔褲波鞋走來見工，我以為佢嚟送貨⋯⋯亦試過有女士低胸短裙仔，我依家請會計唔係知客，同埋公司冷氣凍我會驚你冷親。有啲女士濃妝豔抹，企喺reception已經聞到佢陣香水味，其實輕一啲化個淡妝已經OK。記住，First Impression is King。
2. 錯誤嘅肢體語言－對我來講蹺腳已經係最盡我可以接受。我試過請律師，見工嗰位男孩子將佢自己隻腳L字型咁樣放咗喺佢個膝頭上邊，印下印下，仲要拎住我俾佢嗰張卡片喺度屈⋯⋯我已經好有禮貌同佢完成整個面試，其實一早已經想踢佢走。試過有啲坐到直筆甩，雙手放響大髀成碌葛咁。一睇就知佢緊張到死，嬲佢唔落之餘，忍笑都幾辛苦。又有試過有人講嘢嘅時候好鬼大動作，仲好睇過京劇，差啲枱上邊個杯都俾佢掃低。
3. 開口昅著脷－千祈唔好講前公司又或者你而家做緊嗰間公司嘅壞話，有啲人口沒遮攔，面試嘅時候乜都爆一餐，對面試官來講，我點知你下次會點講我？亦都試過有應徵者拎埋之前公司嘅數據出嚟嘗試去表達佢Excel有幾叻，驚嚇萬分。
4. 問非所答－千祈唔好遊花園，試過有應徵者俾我問咗同一個問題三幾次都冇辦法完整咁樣俾個答案我，要我一步一步咁問佢，佢先至最後嘔到啲嘢出嚟，令人非常質疑佢嘅理解力。其實聽唔明唔係問題，只需要有禮貌咁樣去向面試官講，要求佢再詳細解釋一次就可以。
5. 自視過高自以為是－試過問應徵者佢嘅強項或者弱項係乜嘢嘅時候，佢話我聽佢係冇弱點嘅，聽到我耳都側埋。亦試過有人話，佢之前做親都係大case，你間咁嘅firm仔照計應該輕鬆好多所以申請，真係多謝晒。又有人試過一坐低就問有冇職升，喂你而家都未請就已經咁樣，話你aggressive 定stupid好。
6. Casual Chat係好事，太Casual就係冇大冇細。一見如故呢家嘢，面試唔多Work。試過有應徵者嚟到扮Friend，講嘢東拉西扯語無倫次，咁就當然冇下次。
理想回應篇：
1. 守時及凖時到達－如果需要揸車去，最好先詢問停車資料。最理想係早十分鐘左右到達，太早去到戇居居咁等，有可能令面試官感覺不好意思，遲到就梗係唔理想啦！如果真係遇上緊急情況而遲到嘅話，一定要立即聯絡公司，表示將會稍遲到達。
2. 準備就緒做足功課－你唔需要滴水不漏將成間公司嘅歷史人物全部講晒出嚟，你需要對你所見嘅公司有非常基本嘅知識，例如咩時候成立，主要嘅服務或者產品係乜嘢，又或者公司嘅理念等等，我試過打電話去進行篩選嘅時候，竟然會有人問「你間公司係做咩㗎」，你都估到佢唔會有下文。
3. 簡潔回答加上例子－如果問你有冇相關嘅工作經驗，除咗答「有」之外，最好就能夠舉出相關例證，以支持你嘅論證。過分長氣的回答，正如之前所講會俾人覺得你喺度遊花園。
4. 謙恭有禮互相尊重－有時候當問你問題，可以有禮貌咁講句「多謝你嘅問題，我認為⋯⋯」、「就以上問題我有以下回應」，若然對問題不了解，別胡亂給予答案，寧可詢問清楚，例如「請問可否將剛才問題再次詮釋？不好意思我不想誤會你的意思」，這樣除了能夠更清楚了解問題以外，避免回答錯誤，更能夠讓到面試官認為你是一個會先履清問題而不會是隨便下決定的人。
5. 小心回答強與弱－當被問及strength and weakness嘅時候，十個著有八個都會答錯。好多人會將呢樣嘢同advantage and disadvantage混淆。前者係有關待人接物以及處事手法嘅意思，後者通常係有關知識層面經驗又或者技術。例如好多人會回答英語係佢哋嘅weakness，其實對我來講係錯嘅，因為呢個只係disadvantage。如果你話係一個守時嘅人，呢個就係你嘅強處，如果你話你係一個不會Say No嘅人，呢個就係你嘅弱點了。而當你去演繹strength and weakness嘅時候，一般都會配以例子以及改善方法，令面試官能夠更加認識你嘅個性。
6. 詢問公司情況－多了解公司嘅情況，例如公司未來嘅業務發展，又或者公司文化等等，去表示你非常有誠意加入公司一齊打拼。你都可以問一下面試官（通常就係你嘅未來上司）對其下屬嘅要求，喜歡嘅溝通方法及做事方式，甚至將未來員工嘅期望。一來睇吓自己能否配合得到，二來亦都可以從中表達自己就係嗰個合適人選。
7. 其實面試除咗講你有冇能力之外，亦都好着重你嘅態度。對於我嚟講識唔識做某啲嘅工作，係可以斟酌嘅，因為唔識可以學識，然而工作態度及習慣，比起學習新技術來得困難，因此了解公司文化以及處事方法，十分重要，如果真係未能配合到，亦都唔好夾硬嚟，浪費雙方時間。
見工如打仗，因為職位可能只係得個三幾個，爭嘅可能有幾十甚至過百人。就算你有機會面試嘅話，必須充分準備同埋一定要有一種係去Shine yourself嘅心態。將你最好最理想嘅一面完全淋漓盡致嘅表達，同時亦需要公平公正，切勿誇張其詞言過其實，畢竟請咗你其實你都仲有試用期，呃唔到人幾耐，倒不如腳踏實地老老實實，見招拆招，方為上策。
跟住落嚟會同大家繼續分享見工點先知道自己成功與否，有冇機會。
關於作者：澳洲企業HR人，作者授權。
免責聲明：博客作者之立場並不代表Ozstarter的立場， 敬請留意