若然你申請嘅係一啲中層嘅職位例如主任級或經理級職位，履歷就可以長少少，因為好多時候中、高級職位更加睇重工作經驗，若然工作經驗唔夠，就當然睇都唔會睇。
有人話履歷寫得長冇人睇，有人話履歷寫得短唔會理，咁究竟一份能夠令到人事部睇嘅履歷，應該點寫呢？
履歷我真係收唔少，有啲鬼五馬六，柯式印刷、大頭照、生活照、挺胸收腹⋯⋯應有盡有。內容亦都百花齊放，有啲只係得兩句，有啲八頁紙，有啲得個一兩頁。有啲長篇大論，甚至佢小學攞過咩奬都會話你知，有啲乜都唔寫，你完全唔知佢成世人做過啲乜。亦有人有咁大吹咁大，話自己係Director CEO，申請嘅可能只係一個售貨員嘅職位。
講來講去，即係點呀？就咁，一份基礎嘅履歷，必須要包含下列一啲嘅資訊：
1. 基礎聯絡資訊－你全名，聯絡電話， email甚至你住響邊一區都要寫低。住邊區要寫低嘅原因係因為公司係會睇一睇你嘅居住地點同工作地點相距有幾遠，因為若然相距太遠嘅話就算你拍晒心口話冇問題，公司始終都會有個隱憂就係你每日用大量時間返工放工，會影響你嘅工作表現。
2. 個人目標及工作願景－通常唔需要寫得太長，大概三至五行交代一下你嘅工作目標，對未來嘅抱負等等，令睇履歷嘅可以用最短嘅時間知道你嘅目標是否配合公司嘅長遠願景。
3. 相關工作經驗－盡量將你過去工作職責同現時所投考嘅工作串連，找出兩者相同或相似嘅地方並加以詳細描述，以表示你係有相關嘅工作經驗並能夠盡快上手。
4. 可以操作嘅軟件以及Microsoft程式－有好多工作都會要求應徵者係懂得使用某些特殊軟件，例如會計可能需要你懂得使用Xero或者MYOB等等，工程師可能需要懂得用Cat，IT就需要懂得微軟又或者蘋果嘅作業系統。若然你有相關嘅知識甚至有相關嘅學歷，不妨都放響履歷，增加自己嘅籌碼。
5. 在撰寫相關經驗時，不妨具體地列出工作時候的一些數據，例如申請嘅係培訓職位，可以於履歷中寫上曾經培訓人數，或者可提供培訓嘅範圍；若然你申請嘅係Payroll，你之前所用過嘅軟件，甚至你每月要處理多少同事嘅薪酬，都可以一一列出，以表示你嘅工作能力。畢竟數據係有跡可尋，總比你話俾人聽你識做咁虛無飄渺來得實際。
6. 最好唔好言過其實，吹還吹，吹得太大到時俾人問兩句原形畢露你就冇癮。
咁履歷究竟要有幾長呢？其實都係非常之決定於你申請嘅係乜嘢類型嘅職位。若然你所申請嘅只係比較低級一啲初級文員職位，履歷可能只係需要兩頁紙已經好足夠，畢竟職位要求並唔高，你寫得咁長人事部亦都唔會花時間睇晒佢；若然你申請嘅係一啲中層嘅職位例如主任級或經理級職位，履歷就可以長少少，因為好多時候中、高級職位更加睇重工作經驗，若然工作經驗唔夠，就當然睇都唔會睇。
若然你話我喺同一間公司做過唔同嘅職位，咁應該點樣喺履歷當中表達呢？好多時候都可以將佢分開，唔好將佢擺埋一齊講因為非常容易令閱讀嗰個產生混亂。例如你係由一個銷售開始一直不斷嘅攀升最後係做到地區經理，咁你就需要將呢幾個唔同嘅職位同埋階段分別嘅列出，並於面試是詳細解釋。
最後履歷寫好咗，可以比多一、兩個人望多幾眼， 有冇串錯字又或者有冇用錯文法等等，雖然並唔係重點，錯得太多始終都唔好睇。
當所有嘢都準備就緒，而你亦都獲得面試機會嘅時候，恭喜你。下一篇會同大家一齊睇吓面試時候應該注意嘅地方。
關於作者：澳洲企業HR人，作者授權。
免責聲明：博客作者之立場並不代表Ozstarter的立場， 敬請留意