喺澳洲，搵工仲有一個方法，就係靠關係。正如我所講人事部每日收咁多履歷，邊得閒睇咁多。你份履歷就係眾多履歷當中嘅其中一份，如果你咁好彩能夠搭上搭，識到一個半個公司裏便嘅人，咁人事部睇你份履歷嘅機會又會增加。
(Sydney HR)
最近有網友於YouTube上發表咗兩段嘅短片，分享搵工及見工嘅心得以及如何將自己嘅履歷寫好。網友十分有心，同時間我都想以一個人事部職員嘅角度佢同大家分享一下見工以及撰寫履歷方面一啲嘅見解。
小弟作為人事部職員，招聘，公司人事問題嘅管理，以致培訓，都有機會涉足。若然我哋集中討論招聘，不如首先就以履歷講起。通常一個職位，會收到幾多份履歷呢？其實非常之睇當時這社會氣候環境以及係咩職位。舉個例子吧，做零售嘅，一般來講店面銷售，一日可以有十幾廿份履歷寄到你嘅電郵旗下，根本無需於任何求職網站賣廣告，啲信都會越雪片咁樣飛來。而低技術勞工，例如操作簡單機器，流水線等等，只係需要係一啲免費刊登廣告嘅求職網站作出招聘，基礎上每日都會有二、三十人申請。
白領嘅話，就非常之睇你係招聘緊乜嘢職位，例如招聘會計，若然係入職會計嘅話，喺求職網站賣廣告，平均一個星期你都會收到廿幾三十份履歷俾你慢慢睇，IT情況都係相約。若然係一啲比較高技術嘅職位，就好睇你出手有幾高，出手越高當然越多人有興趣。
其次係需要睇一睇當時係屬於咩嘅時間。喺澳洲一般來講12月同1月係淡季，因為有好多人都會等埋年尾嘅花紅，以及陪小朋友放完暑假，有啲甚至會過埋國慶之後先至開始搵嘢做，所以好多公司都唔會選擇於年底以及一月嘅時候進行招聘。而年中因為係財政年度，好多公司需要忙着向政府提交報表，亦因此會慢咗招聘。
咁咩時候會爭崩頭呢？就係每年二三月以及八九月嘅時候。因為呢幾個月份係大學生剛剛畢業要出嚟搵嘢做，市場上邊充斥着「新鮮人」，人工相對比較便宜，而且好多都肯搏肯捱，就算收少啲錢都會同你做。
當我哋知道咗搵工嘅季節係點分嘅時候，下一個問題就係有咩辦法可以令到自己增加面試機會。對一啲白領嘅工作，競爭相對較藍領以及零售嘅少，因此需要嘅係響履歷上邊多下功夫，呢樣野我哋下一篇再講。零售同藍領嘅玩法就非常之唔同，你可以想像到，人事部每日要睇二，三十份履歷，仲有好多唔同嘅事情需要辦理，你認為佢真係會好有心機同你逐張逐張睇？因此藍領最重要嘅係你能夠於履歷當中清楚咁樣話到俾人聽你有乜嘢流水線或者倉務嘅經驗，零售就當然需要於履歷當中清楚列明你曾經做過邊一間舖頭，而且當中你需要執行嘅職務。零售業一般都會喺履歷當中擺埋自己張相，雖然唔係一定要，呢個係一個習慣。你擺得相，就請你擺一張得體啲嘅，你整張頭髮逢鬆啱啱瞓醒，或者或者喺學校影嘅School Photo，講真，真係有啲sorry囉。咁我又唔係叫你影張¾面西裝打呔嘅專業相，起碼正正常常嘅生活照其實都已經收貨。我收過唔少用美圖秀秀edit過嘅，男女都有，見真人嘅時候，你以為第二個人嚟咗。
喺澳洲，搵工仲有一個方法，就係靠關係。正如我所講人事部每日收咁多履歷，邊得閒睇咁多。你份履歷就係眾多履歷當中嘅其中一份，如果你咁好彩能夠搭上搭，識到一個半個公司裏便嘅人，咁人事部睇你份履歷嘅機會又會增加。因此喺澳洲人脈網絡非常重要，話唔埋能夠幫你搵到一官半職；獵頭公司亦都唔好睇小，因為有啲公司為咗節省人力資源，會寧願俾錢獵頭公司幫佢搵人。有時候將一份寫得整整齊齊嘅履歷發送俾獵頭公司，話唔埋會有驚喜。咁獵頭公司又應該點樣處理呢？我哋會分開再談。
最後，當你睇到份工要求需要有嘅工作經驗你未能夠達到，例如佢要兩年經驗而你只有一年，其實可以照試可也。當然要十年你得兩年貨仔，就梗係唔得。
以上嘅係我做咗咁多年HR嘅一啲經驗之談，當然不能夠以偏概全，僅作參考。
關於作者：澳洲企業HR人，作者授權。
免責聲明：博客作者之立場並不代表Ozstarter的立場， 敬請留意